Pappisangka Na Takkaluppa

Le'ba' niatoro'mi passingkammana bintoenga na bulanga
Le'ba niatoro'mi passingkammana palappopporoka na pa'juluangia

Kamma le'ba' kajarianna nikanayya lassu' , lompo, toa, dalle, saribattang, tautoa na matea
Kamma le'ba' pa'ruppanna mata allo na bulanga riallo bokoanga

Sassala' lalang rupa tau
Sanna sassalana' batang kalenna
Saba' lebba naruppami i Mungkara'  na i Nakkere'
Sisalloangi a'lete na a'leme' ri linoa,
-ngka tena le'ba na naissengi hakikina rupa tau
 tena le'ba na narupai kere-kerea la na oloi ripammoteranna

Sassala' lalang rupa tau
Sanna sassala'na lalang ngati
Le'ba assolommi je'ne' matanna tau toana, saribattanna, bija-bijanna, puri'-purinanna, pindu'-pindu'na
Nassingkamma tong batena nikarruki kalampanganna, singkamma tongi nakarruki batang kalenna.
Ta'bombangi nyawana nilaguang "la ilaha illallah, muhammadarrasulullah"

Sarroi nitappu arenna lalang karruna tu maraenga
La'bi sarroangngangi karru'na
Na tuli sassala' na tappu ri pa'mai'na

Sarroi kalenna ta'bombang "la ilaha illallah, muhammadarrasulullah"
La'bi sarroangngangi karru'na
Na tuli sassala' lalang pa'mai'na

Le'ba' la'busuki kelonna bombang "la ilaha' illallah"
Natappu tommi
"Rimbuki je'ne matannu saribatangku, tena le'ba' niruppai bosi je'ne mata passingkamma ri linoa"
Le'ba nisungke pattongko'na biseanna
Na nakana kelenna ero' ni raka' assipa'jualuang ammotere ri kamponga
Ingka sallo natayang, tena nia' tau anrakaki le'ba' naunna ri biseanga, tena nia' tau si somberang mange rikalenne
-Sangnging je'ne mata mami assikalu' ri pallangngere'na
 Sitallangan naung biseanna
 Le'ba' na cini' riampi'-ampi'na, tena le'ba' rupa tamparang, tena le'ba' rupa bonto na tena le'ba je'ne' manna siatti'

Sannaki rerena kallonna, sannaki lippu nawa-nawanna, sannaki kalenna a'boya ilalang hakikiya
Na tena le'ba nabuntulangi kelenna lalang bajika, sanggenna ni'a sallanna i Mungkara' na i Nakkere'

Sumber: indospiritual.com

Makassar, 23 April 2015